食餐好@秋田錦

其實重有好多過期卜未寫...不過呢篇真係急不及待喇....好回味嘅一餐! 難得我呢個"孤寒祖"豪一豪佢...真係要用9秒9記低佢先...haha!

今晚同咗個朋友仔去"秋田錦"開飯....

我哋叫咗個超豐富2人套餐...先嚟沙律清清腸胃....再嚟....蛋一蛋吖唔該....

woowowo...其中一位主角出場喇...龍蝦....重要係生劏嗰隻...查實個過程都幾殘忍架....龍蝦兄比人乾煎完再斬頭...亞靚仔廚師連佢個殼都唔放過...拎去煲湯.....之但係....佢犧牲得好有價值架...因為...確係好味!! 安息啦...龍蝦兄.........

龍蝦兄轟烈犧牲後...又到鮑魚妹妹出場喇(嗯...我諗鮑魚應該係女仔嚟架...... kakaka ) ...woowooow....鮑魚妹妹啲肉質真係冇得頂!彈牙得嚟又嫩...真係好好味! 之後再整多件鵝肝...煎得好香口....重啱啱熟...very good!!!

呢個以為好普通...不過又幾好味...牛肉夾咗啲蔥同埋炸咗嘅蒜片...夾埋一齊好好食架!

龍蝦兄回魂喇..佢...化成一碗湯番嚟搵我呀...以為佢清清哋冇乜料到...又幾夠味喎! 食咗咁多肉....整啲翠玉瓜食吓先......

其實食到呢刻已經飽咗一半...再嚟多個炒飯真係飽到上心口...咪睇佢咁簡單...又確係炒得好香好好味! 唔覺唔覺居然食得哂成碗飯...超堅!!

好快又食到尾聲喇....整個綠茶雪糕先(其實真係好飽吓...若然呢個係清清哋嘅雪葩就更加好喇!!).....之後...亞靚仔廚師又出動...oh...原來重有個豆沙包架....新鮮熱辣...一路話飽一路係咁食...食吓食吓又食哂...haha!! 都係嗰句啦真係超勁飽....超滿足....超好味同超貴囉! 一於儲錢下次再嚟過...呵!