繼續再玩

上星期六亞祖過咗一個好有意義嘅下午....(實不相瞞...亞祖呢幾十年過咗 N 咁多個"星期六"....都真係冇乜邊個星期六係可以用"有意義"嚟形容架)....究竟幾有意義? 嗯...實情係咁嘅....前幾日我個朋友仔老趙話佢公司最近招攬義工...問我有冇性趣參加.....咁....亞祖平日又真係相當無聊同得閒....難得有啲"正經"嘢做吓.....所以二話不說就應承咗喇!

就係咁....嗰日就約埋老趙同佢啲同樹....一行5人喺荃灣飛的去咗呢度....呢度係邊度嚟架?典解咁多一箱二箱雜物嘅?(其實呢啲笨唔係雜物嚟架...係玩具先真!!)...其實呢度係"繼續再玩"嘅office...咁"繼續再玩"又係乜嚟呢?

查實"繼續再玩"係一個非牟利機構, 佢哋嘅工作主要係收集舊嘅玩具, 之後再將呢啲舊玩具消毒翻新, 最後就會將翻新咗嘅玩具拎去一啲舊屋邨....屋邨嘅小朋友就可以用以物換物嘅方法, 用佢哋玩過嘅舊玩具交換呢啲翻新咗嘅玩具, 然後又再將交換番嚟嘅舊玩具消毒翻新.....循環不息.....可以推動環保之餘重可以教育下一代嘅環保意識, 一舉兩得!

我哋開始之前要先聽講解有乜要注意...亦要知道交換玩具嘅規則...

Briefing完再食飽飽就開始執嘢出發喇...原來有好多嘢要拎架....除咗N咁多箱玩具,重有setup成個帳蓬嘅支架...擺玩具嘅架....用嚟擺回收玩具嘅膠箱...連櫈仔都要搬埋...足足call咗兩架貨van先掂呀....(大家放心..其實唔只得我哋幾個人架...重有其他人幫手...夾夾埋埋都十多個人架)....今次我哋嘅目的地就係..."葵盛西邨"..........(我哋當然唔係喺街市入面擺檔咁型啦!)

原來呢度有個環保活動舉行...而我哋係其中一個攤位....話咁快就setup好個地盤喇...幾快.......呢個就係"繼續再玩"嘅創辦人"肥叔叔"喇......

我哋個攤位又確係四平八穩架......

Set 好哂嘢就要分工喇....我同老趙, Sandy就負責收集玩具...呢個工作係要負責將收集到嘅玩具按佢嘅新舊程度分級...一共有三級...簡單講....若然啲小朋友拎啲又新保存得又好嘅玩具嚟...佢就可以換到份又新又大嘅玩具(獎勵佢哋咁珍惜啲玩具)...反之...若果啲小朋友拎啲又殘又舊嘅玩具嚟...佢就只可以換到啲較細件嘅玩具喇....

你睇...未開始已經有好多小朋友望住啲大玩具虎視眈眈喇.....又問我哋點玩啦...又比手上嘅玩具比我哋睇.....叫我哋評吓分.....

之前聽負責人之一嘅"瘦姐姐"講呢條邨有好多小朋友.....事實又確係如此呀....幾乎做到冇停手呀......啲小朋友都相當湧躍....

話咁快太陽又落山喇.....忙咗一個下午......

嘩...睇嚟成績真係好好咁喎....收集咗好多舊玩具....不過約咗人趕住走幫唔到佢哋收拾行裝就要閃喇....真係唔好意思呀....

查實今次真係好開心可以參予呢個咁有意義嘅活動....不過見到啲小朋友拎住啲又殘又舊嘅玩具排隊嗰陣...個心確係有點酸呀....諗起肥師奶同排骨仔...(我嘅姨甥女同姨甥仔)....佢哋有玩之不盡嘅玩具...但係呢度嘅小朋友想拎啲好少少嘅玩具出嚟換份大玩具都冇....可見香港確係非常之貧富懸殊!不過見到佢哋擺低啲舊玩具再跑去換啲recycle玩具嘅開心樣都總算有啲安慰!

雖則住喺呢啲舊屋邨嘅小朋友一般嚟講都可能比較貧窮...物質生活冇咁富裕, 之但係可能佢哋更加懂得珍惜擁有嘅嘢...更明白幸福唔係必然嘅道理....不過....屋邨(由其係舊屋邨)入面嗰種"人情味"同"守望相助"嘅精神恐怕喺好多私人屋苑甚至豪宅都未必搵到, 世事無絕對嘛...屋邨都有佢"可愛"嘅一面...

亞祖曾經住過兩個公共屋邨....第一個屋邨雖然間屋超細又超舊...之但係亞祖住得最開心嘅一個地方....嗰陣同啲隣居感情確係唔錯....對面屋成家人去咗旅行嘅時候....佢哋會擺低條鎖匙比我哋....搵我哋幫佢餵魚....而隔離位師奶就成日請我哋食麵包...我老豆呢...就最喜歡整蛋糕同其他鄰居分享! 搬咗去第二間公屋...雖則同啲師奶冇咁熟...不過起碼我清楚知道佢哋姓乜名乜...亞媽病嘅時候都經常慰問...見我瘦咗佢哋都話覺得心痛叫我保重....

到家陣搬咗嚟呢個私人屋苑參唔多半年...我重未知隔離屋嗰對夫婦姓乜名乜...連見到面都好似唔多想打招呼咁, 連上手住戶(即係我家姐)都覺得係咁..真吹漲...其餘6伙隣居幾乎冇乜見過.....幸好尚有一對年輕婦夫...喺番工搭lift嗰陣都經常碰面....都會點個頭講聲早晨....唔係嘅話...我真係以為成層樓得我一條友住呀!