搓my breads (第四至十課)

終於可以寫番篇卜喇...呢幾日成日都login唔到...好飄忽呀! 真係趁有得寫好寫...有得食好食...有得著好著...趁重login到就拿拿淋寫埋篇搓my breads了咗件心事先!

由於懶嘅關係...都係一次過寫哂咁多堂嘅嘢罷啦...橫掂搓包嚟嚟去去都係將啲粉呀...蛋呀...依士呀...水呀..搓埋一舊....再整啲唔同造型...

呢個係第四堂...整咗洋蔥包同檀香包....乜嘢係檀香包?其實都食網名啫..有啲似麥西哥包(圖中長形嗰啲包)...包上面有一層"傻波羅"...又ok喎! 洋蔥包就更加唔駛講啦...直頭係我嘅飛彿...又香又軟...好味.....

到咗第五堂喇....今次係整粟米包同農夫包...啲同學仔重自備咗啲好好味嘅芝士加落啲包度...正呀芝士我至like架喇! 加埋啲煙肉之後個粟米包就更加香......相比之下個農夫包....嗯.....真係寡咗啲囉.........

由於第六堂病鬼冇番...好快又到第七堂喇....今次整中東包同香草包....個中東包焗好之後要開隆夾啲嘢菜同芝士架...所以焗之前要碌吓舊粉...整到佢一層層有咁....不過原來呢個step都幾有難度....雖則唔係十分成功不過都算ok吖...話哂第一次整嘛...夾埋其他材料就更加好味...至於個香草包...真係太多橄欖....我就麻麻喇!

第八堂喇...有古古力包同芝士包...其實啲古古力包夾咗啲m&m之後甩色好樣衰吓架...不過肥師奶佢就好like啲古古力包...話好好味...個樣有啲衰都冇問題喎haha! 至於我呢...聽到芝士包呢3個字已經好like啦..芝士...芝士....真係好好味架...芝士..芝士..yeah!

話咁快又第九堂....今次整咗啲好肥又好味嘅牛角包呀...真係用超多牛油....見到都有啲驚...不過...又確係幾好味架喎!有咸嘅牛角包...有啲重夾咗條腸仔架...好味....亦都有甜嘅牛角包...加啲吉士同波羅喺面都唔錯呀!

最後一堂喇....今堂教乜?冇嘢教呀.......係咪亞sir呃錢?唔係...其實係啲同學仔發起攪大食會呀....啲同學仔整咗好多嘢食呀......小青蛙就整咗個栗子芝士蛋糕...好味呀...真係超飽.....亞sir都整咗啲麵包條同pizza過我哋食...

連幫手清潔嘅亞姐都陪我哋顛埋一份...整咗啲合桃酥一齊食...

不過...唔知典解..我哋明明四個人(小青蛙, 火星人, 師姐同我) 一齊報...之但係成個麵包班未試過有一次係齊齊整整咁上足成堂...一個二個唔係早走就冇番...真係有阻咒一樣...超邪!