自言自語

尋晚喺我同大家姐喺沙田搭van仔,坐坐吓無啦啦聽到有個坐喺我哋後面嘅女子係度大大聲咁講"主耶穌基督會赦免你哋嘅罪, 佢為我哋釘十字架....."

初時我重以為佢同隔離嗰個人傾偈添, 但係又好似冇人搭爹咁....

但係個亞姐就越講越大聲, 重要repeat & repeat同一番說話, 車!原來佢唔係同人傾梗偈,淨係喺度自言自語咋! 我哋全車人都好無奈咁焗住聽佢講耶穌

! 落車嘅時候所有乘客都不約而同咁怒啤亞姐....佢當然係冇感覺啦!

不過唔知點解我住嗰頭成日都會見到有啲人喺度口噏噏自言自語, 我見過一個40幾歲嘅師奶一路等巴士一路口噏噏勁爆粗, 又見過一個20幾歲嘅女子喺巴士上面一路講嘢一路笑,初頭重以為佢傾梗電話,睇真啲先知佢祗係不斷咁自己同自己講嘢

....不過最得人驚嘅就係連我自己喺公司都係一路寫program 一路口噏噏架(啲同事成日都咁話我架)

....